ASEAN at ang Hamon ng Likas Kayang Pag unlad sa Pilipinas at Timog Silangang Asya AP7 Q4 Week 5-6

Ang ASEAN Community ay binubuo ng tatlong pangunahing haligi: ang ASEAN Economic Community (AEC) na naglalayong bumuo ng isang merkado at baseng produksyon para sa malaya at mabilis na paggalaw ng mga kalakal, serbisyo, pamumuhunan, at paggawa; ang ASEAN Political-Security Community (APSC) na nangangakong tutugon sa mga pangrehiyonal na pagkakaiba sa payapang paraan, isinasaalang-alang ang seguridad ng bawat bansa at ng rehiyon; at ang ASEAN Socio-Cultural Community (ASCC) na naglalayong magkaroon ng nakikilahok, nakatutok, at responsableng pamayanan para sa mga mamamayan ng ASEAN, na may mataas na antas ng buhay, pantay na oportunidad, proteksyon sa karapatang pantao, at kakayahang tumugon sa mga isyu tulad ng sakuna at pagbabago ng klima.

Ang ASEAN ay nakatuon sa pagpaplano at pagsasagawa ng mga hakbang upang maisakatuparan ang 2030 Agenda for Sustainable Development Goals (SDG) ng United Nations. Itinatag ito noong 2015 upang iangat ang buhay ng mga tao, protektahan ang daigdig, at mapagaan ang buhay sa lahat ng sulok ng mundo. Binubuo ito ng 17 layunin na may kaakibat na mga pakay at aksyon, tulad ng: walang kahirapan, walang nagugutom, mabuting kalusugan at maayos na pamumuhay, dekalidad na edukasyon, pagkakapantay-pantay ng kasarian, malinis na tubig at sanitasyon, abot-kaya at malinis na enerhiya, desenteng trabaho at maunlad na ekonomiya, industriya, inobasyon at imprastruktura, bawasan ang hindi pagkakapantay-pantay, mga lungsod at pamayanang tuloy ang pag-unlad, responsableng pagkonsumo at produksyon, aksyong pangklima, buhay at yamang dagat, buhay at yamang lupa, kapayapaan, katarungan at matatag na mga institusyon, at pagtutulungan para sa mga adhikain.

Upang mas mapabilis ang pagsubaybay sa sitwasyon ng mga bansa sa ASEAN sa pagkamit ng mga SDG, naglabas ang ASEAN ng sarili nitong baseline report noong 2022. Ito ay naglalaman ng mga pangunahing impormasyon at buod ng mga datos batay sa mga napiling indikator ng SDG.

Bilang tugon sa mga hamon, itinatag ang ASEAN Community 2015 upang mapaigting ang ekonomiya ng mga kasaping bansa. Layunin nitong makabuo ng isang merkado at batayan ng mga produkto sa ASEAN, na magdudulot ng malaya at mabilis na daloy ng mga produkto, serbisyo, kapital, pamumuhunan, at kasanayan.

Sa kabila ng mga tagumpay, may mga hamon pa ring kinakaharap ang ASEAN: ang pagkamit sa likas kayang pag-unlad dahil maraming SDG ang nananatiling hamon (tulad ng kahirapan, gutom, kalusugan, edukasyon, enerhiya, at trabaho); ang pagiging ganap na kasapi ng Timor-Leste dahil sa pag-aalinlangan sa kakayahan nitong sumabay sa economic development ng ASEAN; ang patuloy na alitan sa teritoryo sa pagitan ng mga bansa sa Timog-Silangang Asya at Tsina, lalo na sa West Philippine Sea; ang pangangalakal ng tao (human trafficking), na may 85% ng kaso ay nagaganap sa rehiyon ng Pasipiko at Silangang Asya, kung saan ang Thailand ang pangunahing tagatanggap ng mga biktima mula sa Cambodia, Laos, at Myanmar; at ang iligal na droga, kung saan itinatag ng ASEAN ang Narcotics Cooperation Center upang kontrolin ang lumalalang kaso ng paggamit ng iligal na droga sa rehiyon.