Kabihasnang Minoan at Mycenaean

Ang Kabihasnang Minoan ay nagsimula sa Crete noong mga 3100 BCE, ipinangalan kay Haring Minos. Sila ay tanyag sa paggamit ng metal at teknolohiya, may sistema ng pagsusulat, at mahusay na manlalayag. Ang Knossos ang naging malakas na sentro ng kalakalan at kabuhayan, na nagpatuloy hanggang sa 1400 BCE bago ito bumagsak dahil sa sunod-sunod na paglusob.

Bago pa man mapasailalim sa Mycenaean ang Crete, nagsimula na ang mayamang kabihasnan ng Mycenae sa timog Greece. Kilala sila sa mahuhusay na lansangan at tulay, at napapalibutan ng matatag na pader. Iniaangkop nila ang ilang bahagi ng kabihasnang Minoan, kabilang ang wika at sining. Bagama't may mga pader na proteksyon, bumagsak din sila noong 1100 BCE dahil sa paglusob ng mga Dorian.

Ang pagbagsak ng Mycenae ay nagdulot ng isang 'Dark Age' na tumagal ng 300 taon, kung saan tumigil ang kalakalan, pagsasaka, sining, at pagsusulat. Matapos ang madilim na kabanatang ito, dahan-dahang sumibol ang panibagong kabihasnan sa lungsod-estado ng Ionia na kumalat sa buong Greece. Ito ang nagbigay-daan sa pagkilala ng natatanging Kabihasnang Hellenic, na tumagal mula 800 BCE hanggang 400 BCE, at itinuturing na isa sa pinakamaningning na kabihasnan sa mundo.